上水雪橇犬疑走失 求助人：「原來情侶鬧交，男狗主特登放走隻狗！」

日前，有網民喺「走失協尋」群組出 PO：「有冇人唔見雪橇，上水大頭嶺村見到，而家喺我屋企，有頸繩，已掃晶片，男仔，6 歲已絕育，識簡單指令。」及後，網民更新返個 PO：「已找到狗主，交返比佢哋了。」

 據該網民透露，原來當日係男狗主特登放走隻狗：「事緣係狗狗本身嘅主人移咗民去新加坡，之後就交咗畀現時嘅中年男女養。嗰晚原來佢哋兩個人鬧交，男狗主就特登放走隻狗，因為住附近居民認得個男人住邊，於是我哋上門拍門，應門嘅係個女嘅，我俾隻狗嘅相佢睇，問係咪佢養，佢認係。我再問佢知唔知佢隻狗兩日唔見咗佢冇擔心過？佢答嗰晚同男友鬧交，男嘅就放咗隻狗出去，之後又話隻狗係識自己返屋企㗎嘛⋯ 聽完我堅嬲，擔心唔知幾時又放走隻狗，點解小朋友會有啲咁嘅主人？不過點都好，都要交返隻狗俾佢哋。在此，多謝『走失協尋』群組幫手分享我個 post 嘅人。」

資料來源：fb @ Melonheung Crain