消委會：網購貓狗患病比率高 逾 9 成欠針卡 漁護署呼籲「領養代替購買」免墮「寵物釣魚詐騙」陷阱

漁護署同消委會合作，探討本港網購寵物同「寵物釣魚詐騙」嘅相關情況，早前以問卷調查方式向本港註冊獸醫了解寵物來源同佢哋嘅健康之間嘅關係。調查結果顯示，求診嘅網購貓狗，患病比率高，當中超過 9 成欠缺適當疫苗接種紀錄；有 9 成獸醫相信網購貓狗好可能來自不良賣家或環境惡劣嘅繁殖場，健康狀況成疑。

消委會亦以神秘顧客形式接觸網上售賣寵物嘅賣家，以了解佢哋慣用嘅銷售手法，結果發現賣家普遍會通過社交媒體平台發放載有狗隻得意相片或影片嘅帖文，附有簡單描述吸引買家，發文者會要求留言人士以私訊形式作進一步溝通。結果又發現普遍賣家都冇提及運送途徑同未能提供狗隻嘅合法來源證明或相關文件。另外，有聲稱持有本地認可狗隻繁殖牌照嘅賣家，以唔同藉口表示未能提供俗稱「黃紙」嘅《狗隻繁育者聲明書》黃色副本。

漁護署提提大家：

網購寵物風險高

市民冇得直接檢查寵物或者唔了解寵物身處嘅地方情況，容易貨不對辦，甚至買咗一啲患病嘅寵物，加上賣家身分不明，就算有問題都好難追究。除此之外，網購寵物亦可能助長無牌繁殖同走私活動，損害公眾衞生同動物福利。

持牌賣家有保障

至於動物售賣商、繁育狗隻牌照同單次許可證持有人須嚴格遵守發牌條件，確保動物活動空間、衞生、通風等要求符合規定，漁護署會不時巡查相關處所確保牌照持有人遵守規定。根據牌照規定，持牌人喺刊登出售動物嘅廣告中，亦必須列明有關牌照或許可證編號。市民如果有懷疑，可致電漁護署熱線 2150 7077 核實相關資料。

授權轉載：漁農自然護理署