無情主人棄貓於垃圾區好心清潔姨姨隨即接走寵物美容店接收盼為其尋家

日前，一位好心清潔姨姨工作時見到有個男仔拎個貓袋連貓，再加埋少量貓用品揼喺垃圾區。清潔姨姨一問之下，個男仔好輕鬆咁話：「唔要喇，一係我會拎去漁農署。」清潔姨姨隨即接走貓貓，之後就送咗過去寵物美容店「寵物宅」，希望佢哋幫到貓貓。

「寵物宅」負責人詩姐姐出 PO：「貓貓係男仔，未絕育，主人話佢七個月左右，但我諗佢有啲時空錯亂，以佢體形同牙齒睇嚟，點都行咗成人禮，有一歲幾以上㗎喇！貓貓性格好好，會癡人。當佢知自己被遺棄時，佢流露出絕望嘅表情...」

希望有個愛心家庭可以俾個家佢！有意了解或領養貓貓，可直接聯絡「寵物宅」詩姐姐（2479 9999），感謝！除咗呢隻貓貓之外，佢哋都收留咗其他貓貓，都係待領養㗎！