主人搬走… 被遺下的溫馴大狗狗終有寄養家庭了！

大家仲記得呢隻溫馴嘅大狗狗 Asin 嗎？上星期，求助人 Janice 向動保組織 Catherine’s Puppies 求助－Asin 嘅主人搬走咗，留低佢一隻孤伶伶喺度。鄰居 Janice 覺得 Asin 好可憐，將佢暫托，可惜佢即將要長駐內地工作，所以好希望幫 Asin 搵到一個新嘅家，或者至少一個暫托家庭。

日前，城城小編收到 Catherine’s Puppies 嘅好消息：「我哋剛將 Asin 送到一個位於清水灣嘅寄養家庭。呢個家庭非常友善，充滿愛心，相信佢哋一定能夠俾 Asin 感受到溫暖同關懷！」

而更令人更雀躍嘅係，再喺較早前，一對住喺南丫島嘅夫婦亦表示對 Asin 非常感興趣。呢對夫婦非常細心同有耐性，佢哋已經安排好喺兩星期後展開試行領養（Adoption Trial）。如果一切順利，Asin 有望正式加入呢個家庭，成為佢哋不可或缺嘅一份子。

Catherine’s Puppies 亦希望藉此 PO 對求助人 Janice 表示衷心感謝：「Janice 之前唔單止肯收養 Asin，仲非常堅定咁希望幫佢搵到一個合適嘅屋企。喺呢段時間入面，佢甚至為咗 Asin 多次推遲離開香港嘅航班，因為佢唔想喺未確保 Asin 安全之前離開。佢嘅善良同責任感深深打動咗我哋，亦令我哋更加相信，呢個世界上仍然有願意為動物無私地付出嘅好人。」盼 Asin 能夠喺寄養家庭裡面慢慢適應新環境，並順利過渡去到新家庭，擁有屬於佢嘅幸福新生活。