店鋪出 PO 推銷旅行箱 網民錯重點:「跟埋貓幾錢?」
日前,店鋪「深水埗電子特賣城」喺社交平台出 PO,介紹佢哋嘅「20 吋多用途手提旅行箱」。貼文相片相當吸睛,竟然係一隻可愛嘅貓貓坐喺旅行箱入面,而內文仲幽默咁寫:「可以登機(貓除外)。」
結果,網民錯重點完全冇理到個旅行箱,反而將焦點放喺隻貓貓身上!留言區瞬間變成貓奴大集合,大家紛紛留言:「排貓」、「可唔可以要貓唔要喼」、「跟埋貓幾錢」。有網民仲笑指呢款旅行箱嘅「多用途」真係名副其實:「原來行李喼可以當貓窩用」、「個喼真係多用途喎,去旅行得,做貓廁所都得」「佢似搵到個新貓砂盤用咁喎」。
唔少網民仲好奇咁問:「係咪特賣城新請咗位貓店長呀?」面對呢個疑問,特賣城亦即刻回應:「『小白』係隔離舖頭店貓嚟!佢今次嚟客串吓演出咋!」
雖然「小白」只係客串,但佢嘅魅力真係非同凡響,一出場就吸引咗逾千網民點讚!至於嗰款旅行箱因為呢篇貼文有冇好賣啲,就不得而知啦~但可以肯定嘅係,「小白」已經成功俘虜咗唔少網民嘅心!
資料來源:深水埗電子特賣城
人氣文章
主人意外後無法照顧狗狗 領養群組有人接手 幾日後驚聞狗狗疑被棄大圍街上
Jul 21, 2025
【22個月的思念】 群組力量 助狗狗骨灰重返主人身邊 「再次印證 fb 大神嘅威力!人間有愛!」
Jul 8, 2025