屯門山邊皮膚病狗B獲善心人救助 再由「沙律貓狗之家」接手

近期連日暴雨，社區毛孩絕對過得唔容易，而 TuTu 係一隻幸運嘅小毛孩。求助人喺暴雨前聯絡動保組織「沙律貓狗之家」嘅沙律媽，話喺屯門山邊公園連續幾日都見到隻有患皮膚病嘅狗 B 自己一個流連，加上狗 B 皮膚差，好擔心佢挨唔過暴雨。基於「沙律貓狗之家」本身人手不足，實在無法安排外出救援。求助人就表示可以收工後到山上捉狗 B，狗 B 改名 TuTu。

暴雨前奏、濕焗悶熱、近傍晚多蚊嘅天氣下，喺山邊救援毛孩實在唔容易，加上 TuTu 應該流浪咗一段時間，求助人亦唔介意 TuTu 滿身泥濘、皮膚病滲出異味及皮屑，佢就喺山邊將 TuTu 抱返自己屋企，收留 Tutu 一晚，仲幫 TuTu 沖咗個靚涼。

現時 TuTu 已由沙律媽接手，皮膚病亦開始緊藥物治療，沙律媽同義工們都有定時幫 TuTu用藥水沖涼液沖涼。希望 TuTu 快啲變番靚，能夠踏上尋家之路，有愛佢嘅家庭出現！

資料來源： 沙律貓狗之家