待家兩年唐狗 已摘除一隻眼球 再不幸確診淋巴癌

呢隻唐狗名叫 Sunny（男仔；約 4 - 5 歲），佢係喺 2023 年由義工喺工地救起嘅。當時佢身形瘦弱，滿身傷痕，眼睛同屁股位置更被烏蠅蟲侵蝕，需要即時入院醫治。呢兩年幾，Sunny 一直住喺訓練學校，期間因為眼睛傷口感染，要摘除一隻眼球。但即使面對咁多困難，Sunny 仍然默默學習同人相處，練習散步、練習冷靜，一直好乖好合作，係一個好努力求存嘅生命鬥士。

義工透露，其實 Sunny 曾經差少少就可以入屋，但最終因緣份未到而未能成功。「Sunny 性格比較內向，可以話係好『佛系』，唔會瘋狂撲抱，但會安靜企喺你身邊，用眼神同你傾計。佢面上有傷疤，成日俾人誤會佢『面口黑』、『好冷漠』，但其實佢好貼心、好溫柔，只係唔識表達...」

最近，Sunny 不幸確診淋巴癌，不過醫生就話治療好返嘅機會好大，但 100% 會復發。義工依然對 Sunny  不離不棄：「呢個噩耗對我哋嚟講真係心如刀割，但我哋唔會放棄，會陪住 Sunny 打呢場硬仗！」

在此，義工希望可以在此為 Sunny 集氣！大家快啲幫 Sunny 打打氣，希望佢能夠打贏呢場仗，早日康復！

授權轉載：毛寶聯盟有限公司