布甸狗成為「九巴寵物巴士大使」 將於主題巴士同粉絲影相 更會現身 Fun Run 為參賽者打氣

布甸狗粉絲們注意！9 月至 11 月期間，九巴將聯乘 Sanrio Hong Kong，畀布甸狗 (Pompompurin) 化身成為寵物巴士宣傳大使，佢更會躍身於寵物巴士上同各寵物好友一齊乘坐，帶大家遊覽香港。限定布甸狗主題寵物巴士設有唔同打卡道具同主題設計，一眾主人同寵物可以盡情喺巴士上同布甸狗影相，一齊解鎖香港各個寵物好去處。係咪諗起都興奮呢？

搵得咁受歡迎嘅布甸狗做主角，當然唔單止有主題巴士咁簡單啦！喺 11 月 8 日，西沙 GO PARK SPORTS 將舉辦全港首個九巴寵物巴士‧ Pompompurin 親子寵物跑活動！人寵共同參加嘅 FUN RUN 800 米及 1500 米賽事，分為「個人組」、「朋友及親子組」及「寵物組」。

「寵物組」參加者可以同狗狗沿跑道與主題裝飾打卡同一起挑戰障礙賽，期間當然唔少得寵物巴士宣傳大使布甸狗出場同各參賽者見面及打氣，參加者可以喺於報名時選擇跑手限定套票參與「Cheer with Pompompurin」，與布甸狗親身超近距離接觸，名額有限，粉絲一定萬勿錯過呀！每位完成賽事嘅參加者及寵物都可以獲得紀念獎牌、主題 T 恤、紀念毛巾、寵物領巾、襪或運動護腕及拾便袋等，紀念非常豐富㗎！

有興趣嘅布甸狗粉絲，喺 8 月 17 日起就可以喺Fun Run 活動網頁（petbusfunrun.kmb.hk）上報名喇！溫馨提示，首日報名嘅朋友仲可以獲得限量版 Q 版巴士模型，名額有限，手快有手慢無呀！