狗奴們 你有幻想過同毛孩一齊瞓「狗床」嗎？

月前，溫哥華兩名大學生 Noah Silverman 同 Yuki Kinoshita 忽發奇想，設計咗一款人類都可以瞓得嘅巨型狗床，名為 “Plufl”。

“Plufl” 嘅外型其實同普通狗床差唔多，內部係厚厚嘅記憶棉，外層係軟滑嘅人造毛皮；寬厚嘅邊框可以將瞓入去嘅人完美咁包覆住，安全感十足，感覺好似被緊緊擁抱住咁，非常舒適。 “Plufl” 目前可以喺 Kickstarter 網站上預購，短短上架咗幾星期就獲得逾 30 萬美元（約港幣 234 萬元）嘅眾籌支持。

Noah 同 Yuki 表示，佢哋係喺溫哥華嘅一間咖啡室入面諗到為人類設計狗床呢個概念嘅。佢哋本身係咖啡室老闆嘅朋友。老闆養咗一隻可愛嘅狗狗。佢哋見到嗰隻狗狗下午經常懶洋洋咁瞓係張舒服嘅狗床入面，不禁感嘆：「人類都好需要一張用嚟午睡呀！」佢哋嘗試將呢個意念 PO 上網同網民分享，無諗到個 idea 會大受歡迎。

及後，佢哋用咗幾個月嘅時間將 “Plufl” 呢個意念實體化。同好多狗床一樣，Plufl 嘅外型呈橢圓形，仲帶有內置把手，方便折疊同運輸。主人可以輕鬆將佢帶去任何地方，攰攰哋嘅時候就可以隨時入去小睡片刻。家有毛孩嘅話，抱住毛孩一齊喺咁舒服嘅「狗床」入面「覺覺豬」，諗起都幸福呀～

相片來源：ig @weareplufl