前財爺曾俊華愛犬 Oliver 離世「佢曾陪伴我寫財政預算案，好窩心」

日前，前財政司司長曾俊華嘅愛犬 Oliver 離世，及至昨日，佢喺 facebook 寫咗封悼念信畀 Oliver，信中記錄咗佢同 Oliver 嘅回憶。

曾俊華喺信中提到，Oliver 啱啱嚟到佢屋企時，一見面就覺得好可愛，「望住你，就已經覺得好開心」。佢又話 Oliver 好黏人，佢記得自己任職財政司長時，會鍾意走出去屋外嘅空曠地方寫《財政預算案》，Oliver 唔理天氣有幾凍都會走出屋外陪住佢，「陪住我做呢個艱巨任務，真係好窩心」。

佢又話，Oliver 已經同佢與屋企人一齊生活咗 14 年半，雖然一直都有心理準備要同佢講再見，但由於離開得好突然，佢嘅心情到?家都未能夠平復。佢喺信嘅最後多謝 Oliver 留畀佢哋咁多美好回憶，「你永遠都係我哋最心愛嘅小朋友，Oliver，we miss you」，並署名「愛你的公公」。

網民紛紛留言：「薯片叔叔一家保重」、「曾生曾太 take care」、「薯片叔叔，Oliver 會係彩虹橋繼續開心跑跑跳跳，換個方式守護你們一家人，說了再見就會再見，Take care」、「時間會減少痛苦，但不會減少思念。多謝你對小動物的愛」、「薯片叔叔 take care，你一家也帶給了 Oliver 14 年半的愛心照顧，也是毛孩的福份。」