2023 全球最長壽貓貓 - 來自英國 27 歲的 Flossie

先前，我哋就介紹咗健力士世界大全 －全球最長壽嘅狗狗。今次，不如就等我哋介紹埋全球最長壽嘅貓貓啦！

佢叫 Flossie，係一隻來自英國，今年 27 歲嘅棕黑色貓。雖然 Flossie 視力唔好，而且仲已經聽唔到野，但據主人 Vicki Green 講，Flossie 嘅健康狀況依然良好。

Vicki 向外媒講述 Flossie 嘅身世，原來佢嘅身世都有一段故㗎：「Flossie 自 1995 年出生後，佢一直喺利物浦嘅一家醫院附近流浪。及後，佢被醫院一名工作人員收養咗。喺佢主人去世前，佢同主人一齊生活咗 10 年。之後，Flossie 已故主人嘅姐姐收留咗佢。14 年後，佢嘅第二任主人去世，Flossie 就同主人囝囝一齊生活咗三年。最後，Flossie 被交托比動保機構 Cats Protection 照顧。我就係喺 Cats Protection 與 Flossie 相遇㗎喇！

Vicki 雖然知道 Flossie 年紀較大，但就點諗都諗唔到自己居然可以領養到一隻入到健力士世界大全嘅貓。「當我見到 Flossie 嘅獸醫記錄顯示佢已經 27 歲時，我嚇呆咗，因為佢仍然活潑佻皮，根本完全唔似一隻老貓。」

Vicki 補充：「我一直希望領養年長嘅貓，希望提供到舒適嘅晚年生活畀佢哋。領養咗 Flossie 之後，我好希望佢嘅故事能夠鼓勵到更多想養貓嘅人去選擇領養較年長、較需要被照顧嘅老貓。」

資料來源： Guinness World Records