大肚腩厭世巨貓登陸台北貓奴們準備出發去打卡啦！

近日，喺台北大安森林公園捷運站中，出現咗一隻擁有厭世臉同大肚腩嘅巨貓，吸引到唔少台灣貓奴去朝聖打卡！點解呢隻巨貓會喺台北出現呢？事緣係台灣即將舉行一場以「貓」為主題嘅嘉年華，名為「瘋貓祭」，而呢隻巨貓就係為今次嘅祭典而嚟嘅。

巨貓叫「重重」，係一隻橘貓，唔少網民見到佢嘅厭世臉同巨腩之後，都笑指「乜同星期一返工嘅自己咁似嘅？」。

如果咁啱你哋 5 月 6 日至 7 日、6 月 10 至 11 日兩個週末會喺台北嘅話，就可以去到捷運大安森林公園嘅陽光大廳搵「重重」打卡喇！「瘋貓祭」仲有唔少精彩嘅活動可以參與㗎，其中一個貓祭亮點就係場內有個「吸貓空間」，空間入面有十多隻可愛嘅貓咪駐場，如果屋企無貓可吸，又或者有貓仲吸唔夠嘅貓奴們，就可以喺度一次吸貓吸過夠啦！