大埔全新人寵打卡熱點 「巨型冬甩」、「大蕉滑梯」下影靚相

近日，大埔大元商場嘅一樓平台升級成為「寵物共享花園」。花園佔地 2 萬呎，夠晒地方被毛孩們放電。為隆重其事，商場現正舉辦「Play Eat Tai Yuen Pawty」期間限定活動，花園內擺放了多組以美食為主題的創意打卡裝置，包括 3. 5 米高嘅「甜蜜彩虹冬甩」，喺旁邊仲特別設置咗專為毛孩而設嘅「小冬甩」，畀毛孩同主人可一齊拍低有趣合照。另一亮點係超過 7 米闊嘅「香蕉大滑梯」，大家可以喺像真度極高嘅巨型香蕉旁邊盡情打卡。

平台花園更特意增設多項寵物友善設施，例如自動感應消毒液機及寵物專用嘅糧食碗裝置等。花園旁邊嘅食店係寵物友善餐廳嘅集中地，包括日式料理富山居、西式餐廳歐陸冰室及超人氣刺蝟主題咖啡店，全部都設有半露天茶座，大家可以帶埋毛孩一齊用餐。

打完卡、食完「好西」，你仲可以去商場入面嘅「寵物用品回收箱」，將洗淨又無爛嘅寵物用品捐贈畀寵物慈善機構，幫助被遺棄嘅動物㗎！放夠電又食飽飽，仲可以做埋善事，愛寵人士絕對唔可以錯過啦！