騙徒「領養群組」出沒注意！ 專利用人同情心騙財

近日，一位愛護動物嘅網民於「領養群組」出 PO，踢爆一名利用人同情心呃錢嘅騙徒。騙徒事敗後已刪 PO。

事緣該名騙徒於「領養群組」發文，聲稱自己仲有一星期先出糧，希望有善心人可以用轉數快轉賬畀佢醫佢隻貓。有善心網友見佢只係要求要 HK$400，怕毛孩真係會有事，就轉賬咗畀佢。及後，呢位騙徒嘅騙局被踢爆：「今次一張貓相就問人攞幾百蚊！」。原來佢之前已經用同一個 fb 帳戶喺唔同「領養群組」出 PO 問人攞錢，先前分別問過要 HK$600 同 HK$1,500 ，今次就問人攞 HK$400。

有被騙苦主留言：「唉！我心軟，幫咗少少，怕係真嘅，毛孩有事」。而大部分網民表示唔會咁易上當：「正常人簽咭都有啦！唔會咁易信人」、「講真冇可能冇朋友冇親戚，同事都應該有啩，如果真係借唔到咁佢嘅人品都好有問題」、「如果真係差 HK$400 根本就唔需要上 fb 眾籌」、「會叫佢拎診所張單影一影上嚟，要睇到日期同診所，證實到我先會幫」、「就算無人借自己又無現金，碌卡都得啦」、「咁少錢都要人幫？好唔合理囉」。

城城小編在此呼籲大家，小心網上騙徒，切勿輕易相信素未謀面嘅網友！捐款前，切記要謹慎，先作多番求證，以免蒙受不必要嘅損失。

資料來源：fb @Karen Chan