愛貓網民目睹兩父子公園棄貓 B 該父稱：「佢肚痾成日叫！」

昨晚 (6 號)，一位愛貓網民 (網名 Gloria) 喺公園救咗一隻貓 B 之後出 PO：「真係嬲到唔知講咩好... 何謂身教呢？！大家唔好睇相入面嘅 BB 瞓得好似好香甜咁，喺兩個鐘頭前，佢差啲就做咗一隻棄貓…」

事緣 Gloria 晚上經過公園，見到一個目測約廿多嘅爸爸同佢個小朋友。小朋友攞住一個盒仔，然後放低個盒喺公園就走咗去。當時，Gloria 隱約聽盒裡面傳來清脆嘅喵叫聲。Gloria 表示：「小朋友經過我身邊嘅時候聽，佢仲一路細細聲講緊『 拜拜喇貓貓，拜拜喇貓貓』。」

Gloria 立即上前睇吓盒裡面有啲乜，睇一睇，原來係一隻目測只係得兩三個月左右嘅貓仔。Gloria 隨即上前上問兩父子：「隻貓仔咩事？」

爸爸冷冷地回應：「佢肚痾成日叫。你要你咪攞去囉！」然後抱起佢個仔急步走咗。Gloria 將貓仔抱咗返屋企安頓好，亦表示會繼續照顧佢，畀佢一個溫暖嘅家。

資料來源：fb @Gloria Chui