《香港貓迷博覽會 2023》全港首個貓主題博覽
「展覽集團」今日下午喺會展新翼舉行記者招待會，為全港首個以貓貓為主題嘅大型盛會《香港貓迷博覽會 2023》揭開序幕！記者會現場有攤位展示貓貓產品、貓主題畫作及迷你平安貓山，一眾 KOL 帶埋自己嘅得意貓貓到場影相打卡，場面熱鬧！
去到 8 月 25 至 27 日嘅展覽現場，仲會有兩棵分別高達 2 米同 5.5 米嘅巨型「平安貓山」畀入場行展覽嘅貓迷同貓貓打卡，真係令人超期待呀！
《香港貓迷博覽會 2023》活動內容精彩繽紛，不但有貓貓用品，亦有文創產品、潮流玩具、各式精品畀大家選購。另外，仲有一大堆貓貓主題嘅精品可以畀各位貓迷自己使用，人同貓都可以滿載而歸。除咗買嘢之外，仲有藝術展覽、音樂表演、精彩講座等等，相信一定可以令各位貓迷滿載而歸。以下等城城小編一齊同大家睇吓有咩重點必去位啦！
－「平安貓山」：由 3000 個「平安貓包」(內含貓草) 組成，打卡必去！消費滿 150 元可以參加抽獎，有機會將共有八款的精美貓包包拎返屋企。
－「千禧百貓圖」：由中國著名國畫家李玉凱先生為 2006 年貓迷會繪畫嘅「千禧百貓圖」，10 米長的畫卷中共有 100 隻貓。此畫作當年在港展出後，收藏喺美國 CFA 博物館，今年再喺香港可以睇到喇，實在係機會難逢。
－ 貓藝廊藝術展館： 8 位藝術家共 29 幅作品可供購買，貓藝廊會將 10% 收入捐給救貓慈善機構。
－文創市集及貓迷潮藝館：文創市集有多位本地插畫師，其中有「文地貓」現場貓速寫，仲有佢嘅新書簽名會㖭；貓迷潮藝館則聚集各地潮流玩具設計師及藝術家的創作，展示風格獨特的貓貓潮流藝術玩具及周邊。
－「天下貓貓講貓貓」講座：由「天下貓貓一樣貓」主辦，一連 3 日 18 場講座同各位貓迷探討各種貓貓問題。
－CFA 國際分區香港貓展 2023：分成貓組、絕育貓組、幼貓組、家貓組，每隻參賽貓咪都經 8 位評判按美國 CFA (The Cat Fancier's Association) 比賽規例獨立評選。
－鏟屎官大賽：召募各貓奴參與，務求同創世界健力士大全佳績。
仲有好多精彩活動同打卡位講都講唔晒，小編真係好期待到時入場參觀呀！大家都記得 MARK 定時間去睇喇！
*****
【活動資料】
地點：香港會議展覽中心 Hall 3 BC
日期：2023 年 8 月 25 - 27 日 (星期五六日)
票價：HK$30-（持長者咭 / 傷殘人士證 / 1 米下小童免費入場）
時間：8 月 25 日 (星期五)：上午 12:00－下午 9:00
8 月 26 日 (星期六)：上午 12:00－下午 9:00
8 月 27 日 (星期日)：上午 12:00－下午 8:00
(每日閉館前 30 分鐘停止發售 / 換領入場券)
