「龍友」一日去水果檔 3 次 狂影貓店長

新蒲崗一間水果檔有隻叫「寶寶」嘅著名貓店長，相信該區嘅街坊或喺嗰頭返工嘅上班族都一定識得佢。佢實在太得意喇，所以佢嘅萌超經常喺唔同嘅愛貓群組被瘋傳㗎！

日前，一位經常探「寶寶」班嘅網民同水果檔婆婆傾偈，婆婆話其實佢好歡迎哥哥姐姐嚟探「寶寶」班同幫佢影相嘅，只係希望每位嘅影相時間唔好超過 10 分鐘。

婆婆指出，因為近日有一名估計係「龍友」嘅哥哥，由於太想影到「寶寶」嘅每個神態，佢一日去水果檔 3 次，每次都影「寶寶」影好耐（婆婆話佢影超過一個鐘）。於是，婆婆出言相勸，表示要留返啲機會畀其他「寶粉」。

婆婆表示，其實佢好開心經常有人嚟探「寶寶」及同佢影相嘅，不過就盡量唔好影響「寶寶」休息，同阻到其他人探班就可以喇！

溫馨提示：有意去探「寶寶」班兼同佢影張相嘅朋友，最好先禮貌地問准婆婆同意先影，影嘅時間亦唔好太耐，以免阻到婆婆做生意。

資料來源：fb @Ruby Mak