寵物新聞

Aug 24, 2023

貓 B 誤闖老鼠籠內幸獲救 有緣人火速收編

日前,動保組織「浪浪協進會」接收到一個求助。喺港島南區某屋苑附近,屋苑管理員發現一隻誤入花叢內捕鼠籠嘅貓 B 。事緣管理員剛好經過上址,忽然聽到「呯嘭」一聲,驚見一隻貓 B 上半身已入籠內,而下半身則被掩門夾住。

 

幸好管理員眼明手快,立即將貓 B 剩餘嘅下半身順勢推埋入籠,令貓 B 唔會因為被夾住而受傷。最後,貓 B 由該屋苑(同為貓義工)嘅住客代為向「浪浪協進會」求助。

 

「浪浪協進會」表示:「咁啱我哋浪協其中一位義工,一向有打算領養貓咪嘅念頭,機緣巧合下,我哋第一時間將情況講佢知,就係咁,我哋就火速成功撮合咗呢單領養!或者呢啲就係人哋經常講嘅『緣份嚟到,擋都擋唔住』。貓 B 現取名為『檸檬』,目前貓身體健康良好,精神胃口極佳,仲已經喺領養義工屋企,成為家庭成員嘅一份子喇!」

資料來源: 浪浪協進會