唐狗長年被困屋後廢墟 主人獲發公屋將遷離 急尋暫托

「小黑」 係一隻黑色嘅唐狗（男仔； 3 歲左右），佢雖然係有主人嘅，但就從來冇被佢主人愛過...

佢居住係主人間村屋嘅戶外後欄，經常日曬雨淋，從來都冇入過屋。後欄嘅環境非常惡劣，只有一個殘舊同佈滿排泄物同垃圾嘅飛機籠、一條包滿蛇蟲鼠蟻嘅陳年棉被、兩盤佈滿青苔嘅雨水。後欄對出嘅鐵絲網圍住人咁高嘅雜草。呢個就係「小黑」嘅「家」喇...

「小黑」主人表示，因為屋企有貓，所以唔方便畀「小黑」入屋。鄰居實在睇唔過眼，半年前已向動保組織「傻媽流浪貓狗之家」求助。無奈求助期間，「傻媽」嘅狗場面臨巨變，未能接收「小黑」。當時能夠做嘅只可以送糧食去畀「小黑」，再由鄰居喺鐵絲網外拋入食糧餵「小黑」食。

「傻媽」感到非常唏噓：「我哋狗場暫時無能爲力收留『小黑』，我哋現時冇任何駐場義工，加上我每日一個人新舊場兩邊走早已體力嚴重透支。舊場仲有毛孩因場冇位而無法安置，第二期建舍又因資金問題而無法施工。得知『小黑』主人已獲派公屋，『小黑』隨時會畀人『送走』，因此，希望有心人願意伸出援手幫忙暫托『小黑』。我會提供『小黑』所需嘅物資同負責『小黑』嘅醫療費用。萬分感謝！」

暫時傻媽了解「小黑」嘅資料：

－男仔； 3 歲左右

－未絶育

－冇打過任何針

－冇晶片

－因從未被人關愛過，所以有少少驚青

授權轉載：傻媽流浪貓狗之家