愛民邨街坊 Google Map 上驚見已赴彩虹橋「邨代表」貓身影

何文田忠孝街愛民邨呢隻叫「旺旺」嘅貓貓係屋邨嘅「邨代表」，亦係屋邨吉祥物。

今年年中，「旺旺」因病去咗彩虹橋，街坊們都非常懷念佢。以前嘅佢，每日都會坐喺邨內一條水管柱旁邊曬太陽，睇住一班街坊返工返學，同佢哋打招呼。街坊表示：「而家我哋仍然會叫以前旺旺成日坐旁邊嗰條柱做『旺旺柱』㗎」！

日前，一位愛民邨街坊 Google Map 上驚見已赴彩虹橋「旺旺」，連忙喺街坊群組分享。唔少街坊紛紛留言表示好掛住「旺旺」：「旺旺，你在彩虹橋好嗎 」、「好掛住旺旺，睇到個 po 喊咗、「曾經出現在這個時空，有群喜愛牠的人， 不枉貓生」、「見到依個 post 好傷心。喺愛民邨附近返過一年工，有次見到旺旺，佢仲捐我裙底，我笑咗勁耐」、「洋蔥」。

資料來源：「愛民南北（愛民邨／俊民苑）」群組