被倉主嫌棄兩老倉狗幸獲暫托

日前，城城小編報導過兩隻年老倉狗，分別叫「阿妹」及「生滋」，佢哋係「傻媽流浪貓狗之家」裡面三隻合稱「潮州三寶」(簡稱「三寶」) 唐狗嘅嫲嫲 (阿妹) 同媽媽 (生滋)。

近期，倉主開始嫌棄「阿妹」同「生滋」年紀老邁。又有腫瘤，再冇利用價值，表示已經唔再需要佢哋，所以基本上已任由佢哋自生自滅。「傻媽」非常心痛，唔想眼見「潮州三寶」家人老去都冇人照顧，因此「傻媽」好希望幫兩位老人家盡快搵到暫托。

老犬尋得暫托同搵到屋企嘅機率一向相當渺茫，然而，兩老犬得到上天嘅特別眷顧，奇蹟地喺唔夠兩星期就尋到暫托家庭喇！「傻媽」今早立即急不及待向城城小編帶嚟呢個喜訊：「兩位老人家已揾到暫托家庭喇！我已經幫兩位全身勁多機油嘅老人家做好清潔，鏟晒毛沖乾淨涼，之後一兩日會安排佢哋去暫托家庭，下星期會帶兩位有腫瘤嘅老人家見醫生，如報告許可會安排幫佢哋做切除腫瘤手術。」