老狗因唔鍾意出街 被前主人遺棄 日前終獲領養

月前，城城小編報導過一隻因為唔鍾意出街而被主人遺棄嘅 9 歲狗狗「老豆」，嗰時仲擔心「老豆」搵唔到人暫托佢。今日，小編收到喜訊：「『老豆』已經去咗新嘅主人度喇！係正正式式嘅爹哋媽咪，唔係暫托呀！」

據義工表示：「今次嘅爹哋媽咪係一心想照顧一啲冇咁容易出領養嘅毛孩，所以心理質素好好！對於『老豆』嘅性格行為都處於好放鬆嘅態度，只希望『老豆』放鬆健康快樂。領養媽咪讚「老豆」非常叻仔：「以前被遺棄嘅理由係唔肯出街，其實唔係㗎！只要有適當嘅鼓勵同埋練習，你睇吓佢而家行得幾好，仲識得去草草到痾尿尿！每晚『老豆』仲會跟我哋入房瞓，祈求有人會摸頭頭，見到雞柳又識得跳跳腳。」

義工想在此多謝大家：「今次真係好多謝大家 Like，Share 同留言 ，令到多啲人接觸到『老豆』，都話只要有曝光率，待領養嘅狗狗就會有一線生機！」

資料來源：瓹窿瓹罅