公園水池內 小烏龜眼球發炎流血 幸被善心人及時救起並獲收養

日前，有網民喺上環荷李活道公園發現一隻眼球發炎嘅小烏龜。義工去到公園搜索近一小時先至搵到佢。「我哋將佢捉上嚟時，見到佢眼神奄奄一息，相隔前一日求助人  send 俾我哋嘅相嚟睇，情況好似已經轉壞咗好多... 佢右眼已經流血流膿，分泌已經流入口中，已經影響緊另一隻眼。佢不斷張開口，狀甚痛苦。我哋唔知道佢喺水池經歷咗啲咩以致到而家變成咁。」

義工已經將小烏龜帶咗去睇獸醫，獸醫話小烏龜應該將來唔會變盲，只需要呢段時間好好照顧佢。義工出 PO 多謝幫助小烏龜嘅各個善心單位：「感謝  @cherry_happiness_forever 發現受傷嘅小烏龜，並全力加入拯救行動；感謝 @turtles_stray.hk 熱心幫忙搜索消息及提供意見；無限感激 @beaniebarleyberries 出錢出力，仲答應收養小烏龜，小烏龜改名 Woody。」

Woody 現時眼睛嘅最新情況：狀況已比之前好咗好多，眼睛已止血，發炎情況有改善，能夠見到更多眼球嘅範圍。義工 keep 住為 Woody 用生理鹽水清洗雙眼，滴含有 ofloxacin 成份嘅眼藥水為 Woody 消炎。

資料來源：ig @homeless_turtles2023