經歷無數個撲空嘅領養日 「三腳小黃」終於有屋企喇！

上年年中，城城小編幫呢隻叫「三腳小黃」嘅唐狗出過一則「領養快訊」，希望幫到佢早日搵到新屋企。義工一直非常落力幫「三腳小黃」尋家，經歷一年零六個月嘅等待、無數個撲空嘅領養日，皇天不負有心人，「三腳小黃」終於等到佢嘅新爸爸媽媽喇！新爸爸媽媽幫佢改名 Cinnamon。

多年來，「三腳小黃」生活喺一個地獄般嘅環境入面，被前主人長期用鐵鏈鎖喺樹下，好天晒落雨淋，食嘅係麵包廚餘，冬天亦都唔會有一張被一張床。

只有三隻腳嘅小黃， 由於長期被綁，獲救時連行路都有困難，經常失平衡跌低。但係堅強樂天嘅佢，每次跌低都會快速咁爬番起身，再接再厲….以前嘅苦難亦都冇為佢帶嚟陰影，佢對人類嘅愛及包容仍然澎湃！

義工希望在此多謝幫助過「三腳小黃」嘅所有人：「首先要感謝兩位善心托媽，其次係多謝喺『小黃』治療心絲蟲期間照顧佢嘅 Rainbow 姨姨，以及往後一年多接手照顧及幫助『小黃』融入社會，令佢時刻展現出天使般嘅笑容嘅『加比』。最後，衷心感謝大愛領養家長俾『小黃』一個永遠嘅家，一個裝滿愛、關懷及陪伴嘅家... 感謝所有幫助過『小黃』嘅朋友，因為你哋嘅支持，最終『小黃』迎來了幸福。祝願你哋一生永遠幸福無憂！」

資料來源：浪浪之家