狗狗疑因太掛念主人而走失幸獲駕車人士救起「已聯絡主人領回」

日前，一位住錦田十八鄉港頭村嘅網民代媽媽喺走失狗群組出「尋犬啓事」：「我媽媽日前因病住院，狗狗『叻叻』昨晚可能因為太掛住我媽媽而不停吠叫，家人安置『叻叻』嘅期間，『叻叻』走失咗！『叻叻』平時一刻都唔會離開我媽媽身邊嘅，請大家幫忙尋找叻叻！感謝！」

及至數小時前，有人駕車經過元朗朗河路見到「叻叻」將佢先救上車，再出 PO 問有冇人走失狗。唔少喺失狗群組嘅網民都認得「叻叻」，連忙留言叫樓主聯絡主人。

樓主表示已聯絡主人領取返「叻叻」，網民紛紛向樓主道謝：「感謝你救咗佢」、「叻叻有幸平安返家，感謝樓主先 Hold 住，先至唔會變車下亡魂」、「好彩佢好易認咋！搵返主人就好了，多謝好心人救起」。