英國戲院聖誕特設寵物友善場次 讓人寵一同感受節日氣氛

日前，位於英國巴斯（Bath）嘅戲院 Little Theatre Cinema 舉行咗一個特別嘅聖誕放映會。放映會門外更設置咗紅地氈。原來紅地氈係用嚟迎接一班即將入戲院睇聖誕電影 《Elf》嘅狗狗㗎！

當日去到戲院欣賞電影嘅狗狗除咗能夠踏上紅地毯之外，佢哋仲收到零食包、水碗同坐墊。入到影院之後，狗狗就可以舒舒服服咁同主人一齊欣賞聖誕電影，感受節日氣氛。

戲院負責人 Tom Fraser 表示，電影院每月其實都會舉辦一次適合狗狗嘅放映活動，而喺聖誕節前夕就會舉辦更多寵物友善嘅場次。

其實香港有戲院都曾經試過喺上映狗狗題材嘅電影時，特設兩三場寵物友善首映場次㗎！希望及後能夠有多啲戲院能夠嚮應「人寵物共融」嘅文化，增設多啲「寵物友善」嘅場次，令狗主同愛寵可以一齊喺戲院享受睇電影嘅樂趣啦！

資料來源： BBC