元朗村民垃圾堆中救起貓姊妹 現正踏上尋家之路

兩姊妹 Isa 同 Billie 十個月大嗰時畀村民喺元朗嘅垃圾堆中救起，毫無疑問係被人棄養。雖然佢哋經歷過艱難嘅時期，但係仲非常信任人類。而家佢哋居住喺暫托屋企，每次有人開門，佢哋都會衝出嚟夾道歡迎，非常逗人喜歡。

Isa 鐘意瞓大髀，陪人類睇電視；而 Billie 就比較好動又活潑。兩姊妹由出生到流浪都係一齊，每刻都形影不離，其中一個行開嘅話，另外嗰個都會即刻去搵返佢，感情好過好多人類姐妹！

兩隻咁靚咁乖嘅小朋友等緊有緣人將佢哋一齊帶返屋企。佢哋易養易湊，非常適合新手。如想了解更多或有意領養，請到 www.hkpaws.org 然後按 “adopt a cat” 填寫問卷以便機構跟進，感謝！

授權轉載：Hong Kong Paws Foundation