型男馴犬師搭Uber去機場 竟在車上發現被棄養狗B 為收養放棄航班

美國一位型男Augusto Deoliveira有一日call咗Uber去機場，但係上到車佢發現唔對路，因為車後座竟然有隻黑色德牧狗B，Uber司機亦都一頭霧水，直到聯絡到上一位乘客，對方乘認唔想再養但唔知可以點做，所以就將狗狗掉低喺Uber上面。

Augusto自己本身正正係牧羊犬馴犬師，佢實在冇辦法由得咁細嘅狗狗自生自滅，於是佢決定要收養狗狗，最終佢取消航班，並且選擇帶住狗狗由亞利桑那州開車到紐約，之後正式幫狗狗改名做Rolex。

Augusto喺社交網站分享呢一次經歷，形容今次係喺最意想不到嘅情況下遇上狗狗，甚至一度以為係一啲「惡作劇」，經歷隨即爆紅。Augusto話好開心可以遇上Rolex，但亦都呼籲大家，如果冇辦法一定要放棄狗狗，都應該要送去救援機構，而唔係求其掉低隻狗就算。

事實上，當Augusto同Rolex相遇嘅故事爆紅之後，原主人居然厚面皮咁同Augusto講想拎返隻狗走，但係Augusto實在唔願意將狗狗交返畀一個可以隨意拋棄寵物嘅人，雙方而家更加對簿公堂，Augusto話會出盡辦法令Rolex留喺自己身邊。

 資料來源：ig@thedogdaddyofficial