旺角登打士茶餐廳臨别秋波仍不忘救助社區浪貓「社區又少一隻浪浪」

店內收養多隻浪貓嘅旺角登打士茶餐廳喺今日（31 日）結業。結業前，老闆娘琳琳姐除咗一直忙於為多隻店內救養流浪貓物色新屋企之外，仍不忘救助社區浪貓。

昨日（30 日）天寒地凍，琳琳姐得熱心街坊「馬田媽媽」嘅協助，經過大半年時間嘅努力，終於誘導到一隻浪貓返餐廳，貓貓改名「馬拉糕」。今晨，「馬田媽媽」得悉「馬拉糕」極速尋家成功，非常開心喺「登打士」社交平台留言：「今朝起身知道你（「馬拉糕」）已經有屋企，好開心呀！喵喵喵，要乖喵聽話呀，知道嘛？喵～要幸福呀！」

除咗「馬拉糕」之外，琳琳姐呢個多月 keep 住出 PO 向大家 update 多隻店內被救養貓貓嘅最新狀況，及對一眾關心貓貓嘅善心人表達謝意：「多謝連日來咁多愛心人士過來『登打士』相睇，已有 17 隻貓貓準領養中，待家訪完就可以陸續返屋企啦！」