乖巧小狗B空歡喜一場 領養人接返家三個月 只留低「搞唔掂」三字便退養

去年 12 月，一位餵狗叔叔發現 4 隻狗 B，最初有狗媽帶住，後來狗媽死咗，留低咗佢嘅小孤雛。叔叔不忍活生生嘅生命隨時會喪命，最終將佢哋先帶返屋企，然後向義工求助。

義工王小姐只係獨立義工，能力有限，所以佢嘗試揾機構接收，「突然有個義工話可接走 3 隻，咁我就幫剩落嚟嘅狗 B 尋家。而『多多』同佢妹妹就係經嗰位義工成功一對被領養。但領養 3 個月後就一對退回，只留低『搞唔掂』三個字。嗰位義工已經移民，兩姊妹又重回叔叔家。叔叔已有無數救返嚟嘅狗狗要照顧，所以又再向我救助。」王小姐接番兩姊妹後，發覺佢哋完全無行為問題，親人親狗，行街街好淡定，就算行人多嘅地方都無問題。暫托哥哥仲話「多多」超級乖，第一日已可以幫佢剪指甲，第二日已經可以同暫托家中狗狗打成一片。

王小姐慨嘆：「點解領養人唔諗清楚先領養，白白浪費佢哋嘅黃金期，最重要係傷害佢哋弱小嘅心靈！動物唔係玩具，佢哋同人類一樣，有思想、有感情、有血有淚，『多多』同佢妹妹流浪時喺一齊，去到領養家庭又一齊生活，而家突然分開咗，因為佢妹妹都剛被領養咗。暫托哥哥見到『多多』同狗玩時好玩得㗎，但一靜落嚟，眼神就好落寞，若有所思咁，睇見都心噏...」

「多多」等到頸到長埋都未遇上有緣人出現，佢只能夠繼續默默地等待...

如有意領養，請 whatsapp 王小姐 9317 7565（領養者需年滿 25；需接受家訪，承諾日後絕育，住處可養狗，室外飼養免問），感謝！

「多多」資料：

7 個月大，女仔，

長腿小姐，細身，重 7.2

親人親狗，動靜皆宜，活潑健康

備註：需外出大小便

授權轉載 ：fb @ Sylvia Wong