村民向放養狗B發「死亡恐嚇」義工緊急接收 「恐三狗年紀再大 尋家之路更難行」

三隻小唐 B（名「小晴」、「小柔」、「小龍」），佢哋只得六個月大，之前住喺屯門某個村落，係放養犬。

動保組織「守護浪浪福利協會」義工向城城小編講述三隻小唐 B 嘅身世：「當時求助嘅村民唔知道『主人』喺邊度同點解帶咗呢三隻小狗返嚟放養。小狗逐漸長大，佢哋年少無知，冇人理佢哋，被放養後，佢哋每日都周街遊蕩，周圍喺街搵人玩，又會撲向小朋友想小朋友同佢哋玩，所以啲村民就投訴，覺得佢哋非常危險。亦有村民收到消息，有人揚言要放毒藥毒死佢哋，真係天怒人怨！小浪浪實在係走投無路... 情況緊急下，我哋就接收咗呢三隻小可憐，現時由暫托家庭暫時照顧，起碼現時得以安全保命！」

雖然三隻狗狗現時有家庭暫托，但義工就擔心佢哋年紀繼續大落去嘅話，就會越來越難幫佢哋出領養：「我哋已經分別公開幫佢哋三隻狗狗出領養，但完全無人問津... 佢哋只有六個月大，如果佢哋唔係唐狗而係名種狗，六個月大相信已經大把人要，好可惜佢哋係唐狗...」

「小晴」、「小柔」、「小龍」三個小朋友非常乖，義工表示真係好希望趁佢哋年紀仲細嘅時候幫佢哋搵到有心人領養佢哋，幫佢哋搵到真正嘅家：

「小晴」（女仔）－ 性格溫馴，好容易就同人交心。最鍾意反轉個肚仔任你摸，動靜皆宜。

「小柔」（女仔）－ 獨特才能：想去街街嘅時候，佢會自己去攞狗帶話你知佢想去街。

「小龍」（男仔）－ 性格活潑可愛又友善，親人親狗親小朋友。

有意了解或領養「小晴」、「小柔」同「小龍」，請直接 pm 「守護浪浪福利協會」或 whatsapp 佢哋嘅領養專線 (6166 6106)，感謝！

領養須知：

領養人必須年滿 25 歲。

室外養及看門口用途免問。

需要接受家訪，居所必須合法飼養狗隻。

授權轉載：守護浪浪福利協會