波蘭總統訪英 攝影師差點被「首席捕鼠大臣」 絆倒

日前（13日），波蘭總統 Karol Nawrocki 造訪倫敦，與英國首相 Keir Starmer 喺唐寧街10號舉行雙邊會談。呢件事本身好正式，但就喺官邸門前發生咗一件令人啼笑皆非嘅插曲，差啲令呢次外交活動變成「貓界史上最具影響力事件」。

當日，當波蘭代表團嘅攝影師 Mikołaj Bujak 準備步出官邸大門，準備捕捉幾張「國際級大頭相」時，英國內閣辦公室「首席捕鼠大臣」 Larry the Cat 突然無預警由攝影師腳邊竄出！ Larry 嘅「閃電突擊」令攝影師失去重心幾乎幾乎絆倒。最驚險嘅係，攝影師 Mikołaj 手上兩台睇落就好貴嘅相機險些「殉職」，差啲變成碎片博物館嘅展品。

幸好，攝影師 Mikołaj 展現咗超乎常人嘅核心肌群力量，穩住咗自己同埋相機，避免咗一場悲劇。呢場驚險瞬間，波蘭總統就喺後方冷靜目睹全程，表情毫無波瀾。英波雙方會談結果未必係最吸引眼球，但 Larry 嘅一躍絕對成為當日最有話題性嘅新聞！