八哥 BB 被棄養主人現身：「唔想隻狗死喺屋企，所以丟出街」

日前，動保機構 LAP 義工晚上喺中心旁嘅斜坡搵到一個黑色膠袋，裡面裝住一個寵物袋，而寵物袋裡面竟然有一隻八哥 BB。八哥 BB 被兩層膠袋包裹住。喺重重包裹下嘅佢，已經奄奄一息。

過咗一陣間，前主人竟然重返 LAP 中心講畀職員聽，佢就係隻八哥 BB 嘅主人。佢聲稱狗狗有傳染病，叫中心職員小心，更直言狗狗係自己喺網上買返嚟嘅，返到屋企先知原來狗狗患有狗瘟，已經帶咗狗狗睇咗兩個醫生，但都話無得救，所以為免隻狗死喺屋企，就將狗狗丟出街。

LAP 職員馬上將狗狗送往 24 小時獸醫進行詳細檢查，當時佢嘅體溫只得 34 度。及至前日（5 號），LAP 於 fb 專頁公佈八哥 BB 嘅最新狀況：「獸醫已經為狗狗做咗一系列嘅檢查同埋治療，雖然話並唔樂觀，但未去到最壞嘅情況。希望小狗加油！」