空姐帶 4 貓 1 狗移英 仲養埋草泥馬

近年，唔少寵主移民都會帶埋寵物一齊走。做空姐兼 Youtuber 嘅「貓阿媽」(Cat AhMa) 亦唔例外。2021 年，佢移民英國，飼養 4 貓 1 狗 (包括 14 歲英短 Tiger、 4 歲半港短 Marble，以及同樣 5 歲半嘅孟加拉豹貓 Monkey 、挪威森林貓 Mochi  同雪橇犬 Dory) 嘅佢，決定與丈夫同兩個小朋友，加埋老爺奶奶，一家 6 口帶同 5 隻寵物舉家移居英國劍橋 (Cambridge)。

帶同 4 貓 1 狗移英嘅「貓阿媽」並無選擇搵寵物移民代辦公司搞移民，全部文件及手續都係自己一手一腳處理。最後，4 貓 1 狗嘅移民費用大概用咗港幣 6 萬蚊左右。「貓阿媽」一家喺劍橋落腳後，好快就適應到當地嘅生活。熱愛小動物嘅「貓阿媽」更決定養埋兔仔同草泥馬添！係！大家無睇錯！係草泥馬！

點解「貓阿媽」喺英國突然萌生養草泥馬嘅念頭？原來係因為一個特別原因：「我屋企花園唔算細，春天開始隔個星期要剷草，每次剷草都要分幾日進行，靈機一觸，不如養隻草食動物。蒐集好資料之後，發現養羊駝 (草泥馬) 入門相對容易，起居飲食都好容易處理，所以決定喺『英國羊駝協會』搵羊駝嚟養。」

現時「貓阿媽」正飼養嘅兩隻草泥馬（名 Wonky 及 Jasper）已經養咗一年半。「之前我哋有另外兩隻草泥馬，一隻叫 Tommy，另一隻叫 Freddy。因為 Freddy 太早離開媽媽嘅關係，佢冬天時抵抗力不足而感染咗肺炎，捱唔過第一個冬天。亦因為羊駝係群居動物，唔可以單獨一隻飼養， Tommy 就係因為失去咗 Freddy 呢個兄弟以致情緒不穩。當時我哋馬上收養多兩隻草泥馬 Wonky 同 Jasper 陪佢，但最終 Tommy 都係捱唔住，抑鬱病離開咗...」

有關草泥馬嘅習性，一般人可能都知道草泥馬鍾意吐口水同起飛腳。據「貓阿媽」所講，草泥馬其實仲喜歡曬太陽和碌地沙添㗎！佢哋嘅領土意識亦好強，會驅趕其他野生外來動物之外，仲識得定點去廁所。不過，養草泥馬就要特別注意經常會出沒喺草地嘅蝸牛同鼻涕蟲，要盡量將佢哋清走，因為蝸牛同鼻涕蟲可能帶有可致命嘅寄生蟲 (M-worm)，草泥馬接觸佢哋之後，有機會會對佢哋造成生命危險。

城城小編好奇，「貓阿媽」屋企又養貓狗，又養兔仔同草泥馬，咁多種類嘅動物共處喺同一個空間，佢哋真係能夠融洽相處得到？「貓阿媽」笑言：「其實主要都係狗狗 Dory 嘅問題！Dory 唔可以同羊駝共處，佢見到身型大過佢嘅動物會想攻擊佢哋。反而羊駝對貓同狗都表現友善。而兔仔 Aki 就鐘意同啲貓互相追逐。其實只要畀到充足嘅空間每隻動物，佢哋嘅焦慮同暴躁嘅情況自然就會大大降低，所以我會分配唔同嘅『放風』時間畀唔同種類嘅動物，例如：狗同羊駝、兔仔同狗一定要分開時段『放風』。」

最後，城城小編問「貓阿媽」會否考慮養更多動物，佢毫無懸念咁答：「會！喺香港我哋都有 4 貓 1 狗，但係始終空間有限，都無可能養到太多動物。英國室內同室外嘅空間都相對比香港大，英國娛樂亦無香港咁豐富，所以我哋能夠擺到多啲心機同時間去照顧多啲動物。我真係好鍾意動物，如果我第時有個農場嘅話，我會選擇養埋羊、豬同馬。」

特別鳴謝：貓阿媽移英記