8 月 17 日 「黑貓感謝日」

大家知唔知今日 (8 月 17 日) 係「黑貓感謝日（Black Cat Appreciation Day）呢？自古以來，唔少歐美國家將黑貓視為唔吉祥嘅象徵，例如有 13 號星期五見到黑貓就會不幸等嘅迷信講法，導致唔少黑貓遭到殺害。幸好及後動保意識抬頭，為咗令大家唔好再因為迷信而對黑貓產生成見，同希望更多人願意接受黑貓成為佢哋嘅家人，於是美國有愛貓人士就制定咗「黑貓感謝日」呢個節日喇！

外國有研究指，黑貓比斑紋貓少四成機會被領養，比白貓更低三份二機會。不過有動物義工表示，黑貓一樣好鍾意愛撒嬌好親人，性格亦非常好，連小朋友都好鍾意佢哋㗎！

翻查典故，喺古埃及時代，埃及女神芭絲特（Bastet）正係黑貓頭人身，可見黑貓擁有神一般嘅地位。但後來基督教喺歐洲盛行，黑貓成為咗異教嘅象徵，更出現屠貓潮，間接令到由老鼠傳播嘅黑死病傳遍歐洲，至今仍有黑貓被污名化嘅蹤跡。

而世界各地對黑貓都有唔同睇法，例如係英國，就有黑貓走向自己代表會行好運嘅講法；而蘇格蘭同日本，都視黑貓為好運同吉利嘅象徵，更有科學研究發現，黑貓較其他貓有更強嘅抵抗力，病痛可能都會少一啲，所以黑貓對主人嚟講，又點會代表不祥呢？

重溫「齊齊為黑貓平反」嘅短片：bit.ly/3DZ6t7L