被遺棄老唐狗「忌廉伯」 短時間内已籌到目標金額醫藥費

前陣子，城城小編報導過一隻流浪大圍多年、已經 12 歲嘅被遺棄老唐狗「忌廉伯」。大圍街坊發現「忌廉伯」周身傷痕，聯絡漁護處後成功聯絡到晶片主人，但主人並無意接返「忌廉伯」同幫佢醫病。幸獲得義工幫助，帶咗佢去暫托家庭養病療傷。

「忌廉伯」身體檢查後，被診斷出有肝腎及大量心絲蟲問題。日前，義工及暫托家庭為「忌廉伯」喺網上籌集醫藥費，幸運地，「忌廉伯」喺短時間内已經籌夠醫藥費喇！

暫托家庭幫「忌廉伯」改咗個好有型嘅新名，叫「阿瑪絲他」，希望佢可以開展新生活，以後開開心心。現時，義工及暫托家庭只希望「阿瑪絲他」醫好身體，康復後再為佢尋家，令佢能夠安享晚年。

托媽非常感謝大家嘅善心，同連日來對「阿瑪絲他」嘅關注！「喺咁短時間內已經籌得目標金額有多了，所以會暫停收捐款！真係好多謝各位嘅支持，令到『阿瑪絲他』可以安心養病。作為半個阿媽嘅我，真係好想一一多謝大家嘅愛！」為咗可以畀大家知道「阿瑪絲他」嘅最新狀況，同了解佢喺暫托家庭嘅日常生活點滴，托媽幫「阿瑪絲他」開咗個 IG 帳號 (ig @geilimboyboy)，大家可以 follow 吓佢啦！

授權轉載：兩母子