【好消息】黑雨山上被救老唐狗 暫托人終決定領養

日前，城城小編報導過一隻黑雨前，獨立義工自行上山救起嘅老狗「小黑」。義工見到「小黑」時，發現佢肚部異常漲大，立即帶咗佢去 24 小時醫院。「小黑」喺醫院抽咗腹水、咗檢查、化驗、住咗一晚醫院。出院後，「小黑」由一位托媽「兩母子」照顧。托媽原本已經照顧緊兩隻年老狗狗，其中一隻係城城小編都有報導過嘅「忌廉伯」 ，所以當時佢講畀義工聽，極其量只能幫忙照顧「小黑」幾日。

然而，經過短短幾日嘅相處，托媽認為「小黑」非常乖巧，與家中其他狗狗都相處得非常好，加上「小黑」已 15 歲，年事已高，出領養到有一定難度。因此，托媽與家人商討一輪之後決定由暫托變領養，並為「小黑」改名為「黑妹」。

從義工口中得知，「黑妹」原主人原來係一位老伯伯，但因為老伯伯身體狀況不佳而需要入住老人院，所以將「黑妹」就交咗畀朋友照顧。然而，該朋友冇好好照顧「黑妹」，「黑妹」終患重病而離家出走，最後喺屯門山邊畀義工發現。

托媽表示：「我已聯同一班有心人成立咗『黑妹關注組』，會共同撫養『黑妹』直到終老，除咗醫療費用日後需要籌款之外，其他『黑妹』嘅生活費用都會有我哋一齊負責。『黑妹』已經 15 歲，我哋都明白佢呢個年齡呢個身體狀況係好辛苦，所以為咗減輕佢身心嘅痛苦，我哋先有呢個咁特別嘅決定，希望大家日後都會繼續留意同支持『黑妹』。除咗『黑妹』之外，大家唔好晤記得咗『忌廉伯』(現名『阿瑪絲他』) 呀，佢仲係繼續需要等有心人領養㗎！千祈唔好唔記得咗佢呀！」

授權轉載：兩母子