老狗左眼腫瘤滲血 幸獲「動物村」接走醫治

日前，動保機構「老有所依動物村 －洪家棣」去到深水埗接走一隻年老，身體好多問題嘅金毛（男仔）。佢本身係由一位獨居老人照顧嘅，佢全身發臭有蝨，左眼已經冇咗眼救，有腫瘤。由於未絕育，佢睪丸腫大，疑患睪丸癌，肚又有大腫瘤。「佢無名無姓，見佢好開心仔，而且好乖，所以我哋幫佢改名『Happy 仔』，從今日開始就成為動物村嘅一家人。」

「Happy 仔」左眼腫瘤一直滲血，去到診所需要即時留院切除眼同埋睪丸腫瘤，另外會照超聲波睇一睇佢肚脹嘅情況，再決定進一步嘅治療。