青衣三腳唐狗已失蹤 23 天 主人每日各大群組出 PO 尋犬

呢隻三腳唐狗叫「竹竹」 9 月 3 日喺青衣區藍田村屋企門外被一隻冇上繩嘅狗狗接近同嚇親，「竹竹」掙扎期間甩繩，沿長亨邨方向嘅山林跑走咗，至今已經唔見咗 23 日。期間「竹竹」主人每日馬不停蹄，日以繼夜咁四出搜索「竹竹」，周圍派傳單，請商店及社區中心貼尋狗 poster。「竹竹」主人非常感激青衣街坊嘅幫忙：「大部分店舖老闆及社區中心職員都非常友善，容許我哋貼 poster 喺門口當眼位置，完全感受到青衣嘅人情味。在此，再次衷心感謝大家，廿多日以來，無論天氣好壞，都不辭勞苦用各種方式同我地一齊搵『竹竹』， 希望『竹竹』生生性性，唔好辜負大家，早日返嚟同我哋團聚。」

此外，「竹竹」主人每日都會喺「青衣街坊」群組，以及各大失狗群組 update 大家，交代畀大家知，自己同家人去過邊度搵「竹竹」，大部分網民都表示非常支持，鼓勵主人唔好放棄，亦幫忙將「尋狗啟事」share 去唔同群組。但亦有網民對主人每日喺唔同群組上出尋犬帖文大感不滿而留言：「知你哋著緊『竹竹』，但咪鬼每日十幾萬個新 post 洗版得唔得呀？」唔少愛犬人士都憤怒回應：「乜一啲愛心都無㗎」、「有少少同理心嘅人都唔會咁講啦」、「唔鍾意咪就咁碌走佢囉，唔係咪離開群組囉」、「針唔拮到肉唔知痛，等到佢識痛嗰陣就會明白乜嘢叫用盡方法」。

有愛狗之人留言希望平息網上罵戰：「現階段更重要係大家只有一個目的，就係搵返『竹竹』，呢啲『雜音』毋須理會，如果不停你一言我一語，會為本來已因為擔心狗狗嘅主人，增加不必要嘅壓力及煩腦，所以面對呢啲言論，最好嘅應對方法係冷處理，我相信各位關心狗狗嘅街坊及朋友，其實都唔想繼續睇到呢啲 po，因為代表狗狗已一家團聚！」

在此，城城小編祝福「竹竹」快啲出現，快啲番到屋企同家人一齊過中秋，團團圓圓！

資料來源：「青衣街坊吹水」群組