14 歲老犬一晚跑 163 公里尋主人幸有晶片與主人重聚

月前，瑞士警方喺凌晨接到一個求助電話，求助人表示發現一隻疲憊不堪，明顯非常飢餓嘅狗，獨自喺日內瓦郊區嘅小路上閒逛。警方隨即將狗狗送到附近獸醫診所，掃描佢嘅晶片，發現呢隻狗名叫 Lucky，係一隻邊境梗犬，居住喺瑞士首都伯爾尼 (Bern)。

據當地媒體引述，原來 Lucky 嘅主人日前去咗德國渡假，將 Lucky 交托咗俾相熟狗舍照顧。及至主人離開咗嘅第二晚，Lucky 從狗舍逃走。狗舍負責人表示：「後門嘅木欄俾 Lucky 咬開咗一個窿，Lucky 就係穿過個窿逃走嘅。」離開咗狗舍之後，Lucky 竟一夜之間由伯爾尼跑咗 163 公里，去到日內瓦 (Geneva)，距離相當於大約兩個半鍾頭嘅車程！主人得知呢個消息之後，立即從德國飛返瑞士接 Lucky 返屋企。主人表示：「幸好 Lucky 被人發現，而佢亦無受傷。」唔少網民估計，Lucky 逃走應該係因為佢想出去搵主人。