「拯救遺棄寵物中心」負責人 殘酷對待動物罪成

漁護署及愛協於前年突擊檢查時發現，拯救遺棄寵物中心（RCAP）內有 5 隻唐狗有皮膚問題，負責人被控一項殘酷對待動物罪。佢早前否認控罪受審。裁判官昨日喺屯門裁判法院指狗隻傷勢明顯，被告無可能無為意，裁決罪名成立，押後案件至 11 月 22 日判刑。

64 歲女被告黃慧賢，被控喺 2021 年 8 月 5 日，喺天水圍流浮山上白泥 31 號拯救遺棄寵物中心內胡亂或不合理地因疏忽照顧，導致 5 隻唐狗受到任何不必要的痛苦。

控方證人 RCAP 前董事馮惠贊曾作供指，中心人手不足，但有約 300 隻狗要照顧，又指被告不准許義工帶患病狗隻求診；而辯方強調前董事曾濫用中心名義籌款，質疑其誠信。裁判官分析指，即使前董事如辯方所言，干犯商業欺詐罪，亦不代表被告無違法。

裁判官指，被告供稱每日皆有為狗隻清潔，因此無可能無留意到狗隻嘅狀況，尤其涉事狗隻身上流血流膿、皮膚發炎，甚至有腳趾脫落嘅情況。無論被告有無留意到狗隻嘅情況，佢亦唔合理地令 5 隻唐狗受苦，因此裁定被告罪成。

資料來源：judiciary.hk