【健力士世界紀錄】晶片無法證明出生日期 Bobi「全球最長壽狗狗」頭銜遭褫奪

來自葡萄牙嘅阿蘭多獒犬 Bobi，喺 2023 年時以 31 歲高齡，成為健力士世界紀錄認證為「全球最長壽狗狗」。被媒體問及長壽嘅秘訣，Bobi 主人 Costa 表示可能同佢能夠喺鄉郊自由自在地生活有好大關係。

及後，Bobi 喺獲得健力士世界紀錄認證嘅同年 10 月離世，「享壽」31 歲零 165 天，只係冇諗到事隔一年，Bobi 嘅世界紀錄遭到唔少獸醫嘅質疑，導致佢被認證為「全球最長壽狗狗」嘅紀錄要被重新調查。

據外媒引述，獸醫表示阿蘭多獒犬品種嘅狗一般活到 12 至 14 年，而雖然 Bobi 已喺葡萄牙政府資料庫中註冊，但其實葡萄牙喺 2008 年之前嘅晶片登記並唔需要出生證明，資料庫所顯示 Bobi 嘅年齡只係由 Bobi 主人填寫上去。此外，從相片中可見，Bobi 似乎超重，所以長壽嘅可能性比較低。

及至上月，因為 Bobi 主人無其他實質證據可以證明 Bobi 嘅出生日期，Bobi 最長壽狗瑞嘅頭銜最終因此被撤銷。

資料來源： NY Times