10 年前未能收編浪貓感後悔 緣份讓有心人再次遇上另一浪貓 立即決定收編

日前，網民曾生去元朗食飯，食完飯諗住搭西鐵返屋企，沿路經過一個地盤聽到有貓叫聲，然後有隻貓咪突然走咗出嚟。「隻貓仔不停嗲我女朋友，喺佢隻腳度捐嚟捐去。」曾生隨即喺附近搵吓會唔會見到貓媽媽或主人，最終發現唔到。「嗰時又落緊大雨，貓貓又濕晒身，我哋就立即搵廿四小時嘅寵物診所帶咗佢去睇醫生。睇完醫生就帶咗佢返屋企並決定收編貓咪。」

曾生向城城小編透露佢決定收編嘅原因，原來背後係有個小故事嘅。「10 年前同一個地方同一個時間有另外一隻貓都係見到我哋之後走出嚟嗲我哋。但係嗰時因為我屋企本身隻貓有貓癬，困擾咗我哋好耐，所以就冇收編到。嗰次之後，我哋一直都好後悔冇帶佢返屋企。咁今次呢一隻貓，我哋覺得係一個緣份，俾多次機會我哋，所以決定收編！我哋幫貓咪改咗個名，叫『小柔』。」

感謝曾生嘅大愛！祝「小柔」快高長大！生活愉快！

授權轉載：fb @Siu Lung