筲箕灣行山人士發現狗隻殘肢及內臟街坊擔心山上有狗 B 已遇害

月前，有筲箕灣街坊向義工求助－街坊行山時發現到有狗狗殘肢，傷口係齊口嘅！當時現場仲有 5 隻狗 B，街坊擔心疑似有人捉狗 B 食用或殘殺，所以搵義工幫忙帶走狗 B，希望狗 B 唔好慘遭毒手！

經過義工同街坊連日來上山細心觀察，發現現場除咗有殘肢之外，仲有狗毛、狗骨，甚至內臟！街坊由最初發現 5 隻狗 B，然後見剩低 3 隻，到最後狗 B 只淨 1 隻！佢哋懷疑 4 隻狗 B 可能已經遇害！

同時，有街坊報料，事件懷疑同案發地點附近有一間屋仔嘅人有關，屋內現場有人用炭燒過嘢嘅痕跡，而屋仔都有好多未用過嘅炭！亦有街坊報料，山上經常冒煙，夜晚都會有燈光！

經過義工同街坊多番努力下，最後一隻狗 B 最終喺 4 月初用狗籠配合拉繩嘅方法將佢捕捉並成功救出。事後義工就帶咗佢去做各項檢查同沖涼。現名 “Take Two”。事件令狗 B 身心受創，身體亦出現嚴重貧血及中咗牛蜱熱！而義工早前發現嘅殘肢同 “Take Two” 嘅大小及毛色一樣，相信屬於同胎狗 B 嘅！