領養人將貓咪退回原因：便便太臭

呢隻叫 Alvin 嘅貓咪非常不幸，領養人帶返家一星期左右就被退回「香港群貓會」嘅貓屋，而退養嘅原因極之荒唐－因為 Alvin 嘅便便太臭，令領養人幾晚都食唔落飯...

義工表示：「其實 Alvin 去咗領養人屋企五日，發現尿尿有血。我哋立即陪佢去帶 Alvin 睇醫生，抽出來嘅尿尿都係血，醫生已立即開抗生素等藥物畀 Alvin。雖然貓咪去到新環境壓力大引發尿道炎係常見嘅，但以 Alvin 親人嘅性格，去邊都輕鬆自在，應該冇壓力問題，所以我哋都懷疑係咪另有原因。」第二天跟進情況，領養者傳來砂盆照片，令義工發現廁所嘅位置，喺籠嘅層板之下根本唔夠位正常如廁，就提議轉換，但領養者稱如果轉換，Alvin 會從上跳落砂盆，腳會踩到便便，非常污糟，堅決唔換。所以 Alvin 嘅尿道炎似乎完全係人爲！」

過咗兩日，領養者就再 text 義工，表示自己唔適合養貓，話便便嘅氣味令佢食唔落飯。「當晚10pm 我哋義工立即派專車接 Alvin 返貓屋。而當晚 4am，棄養者已經急不及待喺地區 group 免費送出所有養貓用品。」令義工們最詫異嘅係，原來聲稱從未養過貓嘅棄養者，喺 2023 年亦曾免費送出貓籠，可見佢一早已大話連篇，而棄養亦都唔係第一次。「可能佢一直喺度尋找便便唔會臭嘅貓，而世上跟本唔會有！」