唐狗遭捕獸器夾傷見骨需截肢 婆婆痛心 不離不棄 盼愛犬大步檻過

日前，住喺義工 Rebecca 屋企附近嘅一位婆婆，佢所養嘅狗狗「薯仔」手部受傷。 Rebecca 即刻搵婆婆幫手捉住「薯仔」，帶佢去診所檢查。診所醫生話「薯仔」傷勢好嚴重，有可能要截肢。婆婆聽到呢個消息，好心痛…

經過醫生檢查，發現「薯仔」已經發高燒，可能細菌感染入血，導致血小板偏低，HCT 只有 20.9%，仲有貧血同血糖偏低。醫生仲話，「薯仔」更不幸中咗牛蜱熱，身體好疲累，所以檢查時完全冇反抗，只係乖乖趴低畀醫生檢查。

「薯仔」嘅傷口已經有大約五日，受捕獸器所傷到見骨，皮膚同筋腱撕裂，前肢中間兩隻指甲都因為拖行而冇咗... 雖然肝腎指數正常，亦無中心絲蟲，但醫生表示「薯仔」需要住院吊鹽水、食止痛藥同消炎藥，希望可以退燒，盡快進行截肢手術。

婆婆喺診所同「薯仔」講：「乖乖呀，快啲好返，婆婆會接你返屋企！」薯仔似乎聽得明，靜靜躺下休息。醫生建議，如果可以順利手術，手術後最少需要住院 14 日，等傷口盡快癒合。但因為貧血情況，手術後有可能需要輸血。

義工同婆婆傾偈時，發現其實婆婆好錫「薯仔」，但因為婆婆唔知點處理，又冇錢醫治，所以一直拖延。講起「薯仔」時，婆婆眼泛淚光，不停講：「希望『薯仔』可以大步檻過！」

在此，希望大家可以為「薯仔」打打氣，盼「薯仔」可以盡快退燒完成手術！如有意捐助「薯仔」嘅醫療費用，請將聯絡資料 pm 畀城城小編，小編會將資料轉交義工。每一份心意都係支持，每一個祝福都係力量！

授權轉載：fb @ Rebecca Szeto