天氣轉冷 粉嶺村民河邊發現疑走失貓瑟縮一角 「小玉谷」緊急接收 盼主人現身

昨日（18日），一位村民喺粉嶺龍躍頭村附近嘅地盤河邊，意外發現咗一隻長毛貓咪。據村民表示，當時寒風刺骨，貓咪蜷縮喺角落度，足足一個鐘頭都唔敢郁。由於附近並冇適合嘅地方俾佢避寒，該村民即時出 PO 求助，希望可以幫貓咪搵返佢嘅主人。

動保組織「小玉谷」負責人小玉睇到帖文之後，發現事發地點距離自己住嘅地方只係五分鐘腳程。「我心諗既然咁近，點可以唔幫手？於是即刻出門去接咗呢隻貓咪。」小玉表示，就算唔知貓咪嘅主人會唔會嚟搵返佢，但至少可以先確保佢安全，之後再安排下一步。

小玉第一時間帶咗貓咪去動物診所進行檢查，包括掃描晶片同埋基礎健康檢查。幸運地，檢查結果顯示貓咪冇傳染病或者其他健康問題，身體狀況良好。小玉亦表示，如果兩星期內冇人認領返佢，會安排幫佢搵領養家庭，希望為佢尋找一個溫暖嘅新家。

如果你認識呢隻貓咪嘅主人，或者有任何相關資訊，請直接 pm 聯絡「小玉谷」。

資料來源：小玉谷