街頭慈善募捐活動 大狗被置高枱上 路人：「佢哋勁驚！」

日前，一家動物慈善團體喺灣仔地鐵站外嘅馬路旁邊做慈善募捐活動，佢哋將幾隻中至大型犬放咗喺高枱上面。有路人等過馬路嘅時候，見到企喺枱上面嘅幾隻狗狗好似好驚咁，腳都震晒，感覺佢哋有啲怕高，亦因為街上面人來人往又多車，所以狗狗都顯得焦躁不安。

路人將狗狗企喺高枱上面嘅畫面影低，並立即將相片 PO 上愛狗群組，引來不少愛犬之人留言，指責並大力批評該團體將大狗放喺高枱上面，同將募捐站設置喺馬路邊呢個做法極不恰當：「地方人又多車又多，好易嚇親啲狗狗」、「好可憐，企到咁高人都腳仔軟，何況狗狗」、「大狗唔可以放咁高，重心問題，而且好多都細膽，真係會嚇親佢哋」、「點解要喺正馬路邊籌款？如狗狗佢哋驚，好有可能會跳出馬路」、「乜咁樣係真心愛狗咩」。

幫助有需要嘅狗狗籌款出發點係好，但希望該慈善團體帶狗狗出街接觸大眾之前先周詳地了解一下募捐地點嘅安全性，關顧狗狗嘅生命安全，以及佢哋嘅心理狀況，以免釀成不必要嘅意外。

相片來源：FB ＠Bu Bu