貓咪偷竊鄰居財物合共 300 英鎊

日前，一名居住喺英國德比郡嘅女士 Donna 喺社區群組出咗一則「失物認領」 PO，帖文除咗張貼咗兩張待領嘅失物相片，包括有名牌內衣和、cashmere 手套、皮革銀包等之外，佢仲喺內文中代愛貓 Harry 向鄰居們道歉。

事緣月前 Donna 執屋大掃除期間，發現屋企多咗唔少並非屬於自己嘅物件，先知道原來愛貓唔知從何時起偷咗唔少隔離鄰舍嘅物品，物品估算大約值 300 英鎊左右。Donna 認為事態嚴重，因此隨即出 PO 向物主們道歉，同時希望能夠物歸原主。

有網民睇到呢個 PO 之後笑言：「Harry 真識貨，有牌子嘅物品先偷。」而 Donna 嘅隔離鄰舍亦已經開始喺帖文留言認領返自己嘅失物：「灰色內衣係我㗎，但係嗰條灰色內褲應該係屬於另一位鄰居嘅」、「之前搵咗隻手套好耐，原來被 Harry 偷咗，多謝 Donna 咁誠實，將自己嘅愛貓供出來」、「雖然我個銀包入面冇錢，但係男朋友送畀我嘅生日禮物，失而復得實在太好了」。