夫婦坐豪華經濟艙 鄰座狗狗狂流口水兼放屁 獲航空公司賠償

月前，紐西蘭一對夫婦 Gill 同 Warren，從巴黎乘搭新加坡航空前往樟宜機場。為咗能夠舒舒服服咁渡過 13 小時嘅機程，兩人選擇乘坐豪華經濟艙。但係，佢哋無諗過隔離座位乘客嘅服務犬全程緊靠住兩人嘅腳邊，仲不時流口水兼放臭屁。夫婦二人隨刻向空中服務員要求調位，但好不幸，豪華經濟艙當日已經爆滿。

空中服務員建議夫婦二人坐普通經濟客艙，喺無辦法之下，夫婦二人勉為其難改坐普通經濟客艙。落機後，Gill 主動聯絡新加坡航空表達不滿，航空公司向夫婦道歉，並送贈 2 張價值 73 美元 (約港幣 570 元) 嘅機場禮券畀佢哋。夫婦表示對該賠償不滿意，兩人堅持再同航空公司交涉後，最終收到 1410 美元 (約港幣 11,035 元) 嘅退款，其中包括普通經濟客艙與豪華經濟艙嘅差額。

夫婦二人收到退款後，決定將呢筆錢捐贈畀導盲犬相關機構。Gill 表示：「航空公司當初應該事前通知我哋隔離座位乘客會帶同服務犬乘坐。錯不在隔離位乘客同佢嘅服務犬，我哋要求航空公司賠償並唔係為咗錢，而係要航空公司承擔責任。」

資料來源：NY Post